اسد الدین اویسی کو فلسطین جاکر بندوق اٹھاکر لڑنا چاہیئے، راجہ سنگھ

اسلام ٹائمز۔ آل انڈیا مجلس اتحاد المسلمین کے سربراہ اور حیدرآباد کے رکن پارلیمنٹ اسد الدین اویسی نے کل بھارتی پارلیمنٹ میں رکن پارلیمنٹ کے طور پر حلف لیا۔ جہاں انہوں نے آخر میں ’جے بھیم، جے میم، جے تلنگانہ اور جے فلسطین اور اللہ اکبر‘ کا نعرہ بلند کیا۔ جس پر گودی میڈیا نے سخت اعتراض کیا ساتھ ہی اسد الدین اویسی کے نعرے پر ’این ڈی اے اتحاد‘ کے لیڈران بھی سیخ پا ہوگئے اور انہوں نے شدید برہمی کا اظہار کیا۔ ہر بار کی طرح اس بار بھی تفرقے کی آڑ میں حیدرآباد کے حلقہ گوشہ محل کے رکن اسمبلی و بی جے پی لیڈر راجہ سنگھ نے بھی اس پر ردعمل ظاہر کیا ہے اور مشتعل بیان سوشل میڈیا پر جاری کیا۔

بیان میں صاف سنا جاسکتا ہے کہ راجہ سنگھ کہہ رہے ہیں کہ فلسطینیوں سے اتنی محبت ہے تو بھارت چھوڑ کر اسد الدین اویسی فلسطین چلے جائیں اور بندوق اٹھا لیں۔ راجہ سنگھ نے کہا کہ ایک مرتبہ اگر وہ فلسطین گئے تو انہیں اصل صورتحال کا اندازہ ہوگا۔ راجہ سنگھ نے مزید کہا کہ بھارت میں رہتے ہوئے یہاں سیاست کرتے ہوئے ’بھارت ماتا کی جے‘ اور ’جے بھارت‘ کے نعرے لگانے کے بجائے ایسے نعرے کیوں لگائے گئے۔ راجہ سنگھ نے پوچھا کہ اگر کوئی اور ’جے اسرائیل‘ کے نعرے لگاتا تو کیا آپ خاموش رہتے، نہیں بلکہ آپ پارلیمنٹ کے باہر نکل کر احتجاج کرتے۔