بھمبروٹ مری، جے ایس او پاکستان کی جانب سے پانچ روزہ جعفریہ تربیتی ورکشاپ جاری، ملک بھر سے طلباء شریک 

اسلام ٹائمز۔ جعفریہ اسٹوڈنٹس آرگنائزیشن پاکستان کی طرف سے پانچ روزہ جعفریہ تربیتی ورکشاپ صحت افزاء مقام بھمبروٹ مری میں جاری ہے، جس میں ملک بھر سے جے ایس او کے جوان شریک ہیں، ورکشاپ میں مولانا ضیغم عباس جعفری نے نوجوانوں سے پیغام کربلا کے متعلق خطاب کیا۔ تربیتی ورکشاپ میں مرکزی چیف اسکاٹ مجتبی مھدی نے نوجوانوں کو اسکاوٹس کی ذمہ داریوں کے متعلق بریف کیا۔ علاوہ ازیں مرکزی رکن مجلس نظارت ڈاکٹر عون ساجد نقوی نے اخلاقی اقدار اور دنیا کے جدید نظام کے متعلق خطاب کیا اور نوجوانوں کے سوالات کے جوابات دیئے، ورکشاپ میں مرکزی رہنما شیعہ علما کونسل پاکستان اظہار بخاری نے نوجوانوں سے" نصاب تعلیم" اور "موجودہ دور کے چیلنجز" کے حوالے سے گفتگو کی اور نوجوانوں کے سوالات کے جوابات دیئے۔ تربیتی ورکشاپ میں صدر شیعہ علما کونسل پاکستان راولپنڈی مولانا غلام قاسم جعفری نے نوجوانوں سے"تجوید اور فقہ" کے حوالے سے گفتگو کی اور آخر میں نوجوانوں کے سوالات کے جوابات دیئے۔