اس ایوان میں ایک ممبر آف پارلیمنٹ کو دہشتگرد کہا گیا کیونکہ وہ ایک مسلمان تھا، آغا سید روح اللہ

اسلام ٹائمز۔ بھارتی پارلیمنٹ کے نئے اسپیکر کا انتخاب ہوگیا ہے۔ اوم برلا دوسری بار پارلیمنٹ کے اسپیکر منتخب ہوئے ہیں۔ آج یعنی بدھ کے روز 18ویں پارلیمنٹ کے پہلے اجلاس میں اسپیکر کا انتخاب کیا گیا۔ اس کے بعد وزیراعظم نریندر مودی اور اپوزیشن لیڈر راہل گاندھی انہیں سیٹ پر لے گئے۔ اپوزیشن نے صوتی ووٹ پر تقسیم کا مطالبہ نہیں کیا۔ اس دوران جموں و کشمیر نیشنل کانفرنس کے نومنتخب رکن پارلیمنٹ آغا سید روح اللہ مہدی نے پارلیمنٹ اسپیکر اوم برلا کو مبارکباد دی اور ان کے سامنے اپنے خیالات پیش کئے۔ جموں و کشمیر کے سرینگر پارلیمانی حلقہ سے نومنتخب رکن پارلیمنٹ آغا سید روح اللہ مہدی نے کہا کہ میں آپ کو دوبارہ اسپیکر منتخب ہونے پر مبارکباد پیش کرتا ہوں، اس کے بعد آپ سے گزارش ہے کہ آج سے آپ کا تعلق نہ تو بی جے پی سے ہے اور نہ ہی کانگریس سے، آج سے آپ کے پاس صرف ایک پارٹی ہے اور وہ ہے ہندوستان کا آئین اور آج سے آپ اس کے محافظ ہوں گے۔

آغا سید روح اللہ مہدی نے کہا کہ اس ایوان میں جسے جمہوریت کی سب سے بڑا ایوان کہا جاتا ہے، یہاں جمہوریت کی مثالیں ملیں گی، آپ کو اس بات سے یاد رکھا جائے گا کہ آپ نے حکمران جماعت کو اپوزیشن کی بات سننے کے لئے مجبور کیا یا آپ نے اپوزیشن کو خاموش کیا۔ آپ کو یاد کیا جائے گا جب کسی ایوان میں ایک مسلم ممبر پارلیمنٹ کو دہشتگرد کہا گیا، کیوںکہ کہ وہ مسلمان ہے۔ انہوں نے کہا کہ اگر ایک ممبر پارلیمنٹ جو عوام کی طرف سے منتخب ہوتا ہے، اگر اسے اس ایوان میں دہشتگرد کہا جا سکتا ہے، تو ان مسلمانوں کو سڑکوں پر بھی دہشتگرد کہا جا سکتا ہے۔ اسپیکر برلا نے آغا سید روح اللہ مہدی سے کہا کہ یہ ایوان کا پہلا دن ہے اور وہ سوچ سمجھ کر اپنے خیالات پیش کریں۔ برلا نے آغا سید روح اللہ مہدی کے اس دعوے کو بھی مسترد کر دیا کہ دفعہ 370 کی دفعات کو منسوخ کرنے والا بل ایوان میں جلد بازی میں منظور کیا گیا تھا۔