کراچی، ایرانی قونصل خانے کے زیر اہتمام "خوبصورت ایران" کانفرنس کا انعقاد

اسلام ٹائمز۔ پاکستان کے اقتصادی مرکز شہر کراچی میں ایرانی قونصل خانے کی جانب سے مقامی ہوٹل میں ایران و پاکستان کے درمیان سیاحت کے فروغ کے حوالے سے ایک کانفرنس بعنوان "خوبصورت ایران" منعقد ہوئی، جس میں شہر کی معروف کاروباری، سیاسی، سماجی شخصیات کے علاوہ روس، ملائیشیا، کویت، جاپان اور بعض دوسرے ممالک کے قونصل جنرلز، پاکستان کے صف اول کی 170 ٹریول ایجنسیز کے نمائندوں اور میڈیا سے وابستہ افراد نے شرکت کی۔ صوبہ سندھ کے وزیر برائے توانائی، پلاننگ اور ترقیاتی امور سید ناصر حسین شاہ اور ٹریڈ ڈیولپمنٹ اتھارٹی پاکستان کے چیف ایگزیکٹیو زبیر موتی والا کانفرنس کے مہمان خصوصی تھے۔ کراچی میں ایران کے قونصل جنرل حسن نوریان نے اپنی تقریر میں میزبان کی حیثیت سے تمام حاضرین کا شکریہ ادا کرتے ہوئے کہا کہ ایران نے سیاحت کے فروغ اور سفر کو مزید آسان بناںے کی غرض سے ناصرف الیٹرانک ویزا جاری کرنا شروع کیا، بلکہ دو مزید زمینی بارڈر کھولے ہیں، جبکہ اس سے قبل پاکستان کے لوگ صرف ایک زمینی بارڈد سے آمد و رفت کر رہے تھے، یہ دو بارڈر ریمیدان اور پشین کے علاقوں میں کھولے گئے ہیں۔

ایرانی قونصل جنرل حسن نوریان نے کہا کہ پاکستان اور ایران کے درمیان سیاحتی شعبے میں مزید تعاون کی ضرورت ہے، سندھ اور ایران کے درمیان کئی ثقافتی اور سیاحتی مشترکات ہیں، جن کی بنیاد پر تعلقات کو مزید وسعت دی جا سکتی ہے۔ حسن نوریان نے کہا کہ ایران میں لاتعداد قابل دید سیاحتی مقامات ہیں اور عالمی ادارے یونیسکو نے ایران کے پانچ تاریخی مقامات کو عالمی آثار قدیمہ میں شمار کر لیا ہے، جبکہ چند دوسرے مقامات بھی اس حوالے سے زیر غور ہیں۔ ایرانی قونصل جنرل نے پراعتماد لہجے میں کہا کہ ایران نے طبی میدان میں بھی خاطرخواہ پیشرفت کی ہے اور اس حوالے سے خطے کے تمام ممالک اور ہمسایہ ممالک کے ساتھ تعاون کرنے کا خواہاں ہے۔ کتاب Parsia The Land of Emperors and Kings  کے مصنف ڈاکٹر افتخار صلاح الدین نے بھی معتبر اسناد و شواہد کی روشنی میں ایران کی تاریخ و ثقافت کے حوالے سے بہت مفصل خطاب کیا اور ایران کے اہم تاریخی و سیاحتی مقامات کا تعارف پیش کیا۔