عمران خان کو جیل میں شاہانہ پروٹوکول میسر ہے، عظمی بخاری

اسلام ٹائمز۔ پنجاب کے وزیر اطلاعات سیدہ عظمیٰ بخاری کا کہنا ہے کہ عمران خان کو جیل میں شاہانہ پروٹوکول میسر ہے۔ مشیر اطلاعات خیبرپختونخوا کے بیان پر ردعمل میں عظمیٰ بخاری نے کہا کہ بانی پی ٹی آئی کسی بل میں نہیں چھپے، جن کو باہر نکال لیا جائے گا۔ انہوں نے کہا کہ پی ٹی آئی کے بانی چیئرمین کرپشن کے میگا سکینڈلز میں مجرم ڈکلیئر ہیں، جنہیں جیل میں شاہانہ سہولیات میسر ہیں۔ وزیر اطلاعات پنجاب نے مزید کہا کہ آپ لوگ 9 مئی کے جعلی بغاوت سے بری طرح بے نقاب ہوئے، اپنے جرائم اور ناکام بغاوت کا ملبہ مریم نواز پر مت ڈالیں۔

سیدہ عظمیٰ بخاری کا مزید کہنا تھا کہ 9 مئی کے مقدمات میں زیرحراست خواتین اپنے جرائم کی سزا بھگت رہی ہیں۔ عظمیٰ بخاری نے یہ بھی کہا کہ عید کے روز بھی آپ اپنی نفرت انگیزی اور حسد چھپانے میں ناکام رہے۔ انہوں نے کہا کہ پہلے آپ لوگوں کی باتوں پر ہنسی آتی تھی، اب خیبرپختونخوا کے لوگوں کے مقدر پر رونا آتا ہے۔