مودی کیمپ کے لوگ میرے رابطے میں ہیں، راہل گاندھی

اسلام ٹائمز۔ انڈین نیشنل کانگریس کے مرکزی لیڈر راہل گاندھی نے وزیراعظم نریندر مودی پر سخت تنقید کی۔ انتخابی نتائج کے بعد فنانشل ٹائمز کو دیئے گئے انٹرویو میں راہل گاندھی نے کہا کہ مودی کی شبیہ تباہ ہوگئی ہے، مودی کا نظریہ تباہ ہو چکا ہے۔ راہل گاندھی نے کہا کہ بی جے پی کا بنیادی ڈھانچہ اور مذہبی عداوت پھیلانے کا اس کا نظریہ منہدم ہو گیا ہے۔ راہل گاندھی نے کہا کہ نریندر مودی حکومت کو زندہ رہنے کے لئے جدوجہد کرنی ہوگی۔ انہوں نے کہا کہ ان انتخابات کے غیر متوقع نتائج کے بعد ہندوستانی سیاسی منظر نامے میں تبدیلی آئی ہے اور وزیر اعظم نریندر مودی کی حکومت کو زندہ رہنے کے لئے جدوجہد کرنا پڑے گی۔ نتائج کا ذکر کرتے ہوئے رائے بریلی کے رکن پارلیمنٹ راہل گاندھی نے کہا کہ سیٹوں کی تعداد ایسی ہے کہ وہ بہت نازک ہیں اور ایک چھوٹی سی غلطی حکومت کو گرا سکتی ہے۔

کانگریس لیڈر راہل گاندھی نے دعویٰ کیا کہ مودی کیمپ میں کافی عدم اطمینان ہے اور بہت سے لوگ ان کے رابطے میں ہیں۔ تاہم راہل گاندھی نے اس حوالے سے مزید کوئی جانکاری نہیں دی۔ فنانشل ٹائمز کو دیے گئے ایک انٹرویو میں راہل گاندھی نے کہا کہ یہ نظریہ ہے کہ آپ نفرت پھیلائیں گے، غصہ پھیلائیں گے اور آپ کو اس کا فائدہ ملے گا۔ ہندوستان کے عوام نے اس نظریے کو اس الیکشن میں مسترد کر دیا۔ انہوں نے کہا، یہی وجہ ہے کہ حکمراں اتحاد اس بار جدوجہد کرے گا، کیونکہ نریندر مودی کے لئے 2014ء اور 2019ء میں جو کام کیا وہ کام نہیں کر رہا ہے۔ راہل گاندھی نے انٹرویو میں دعویٰ کیا کہ مناسب حالات میں اپوزیشن انڈیا اتحاد بغیر کسی شک کے اکثریت حاصل کر لیتا۔ انہوں نے کہا کہ ہم نے ہاتھ باندھ کر الیکشن لڑا لیکن عوام نے ہمارا ساتھ دیا۔