وادی کشمیر میں مطلع الفجر کا تین روزہ کارگاہ منعقد

اسلام ٹائمز۔ جموں و کشمیر متاب کی جانب سے تین روزہ تعلیمی تربیتی و فکری مطلع الفجر کارگاہ اپنے اختتام کو پہنچا۔ قوم و ملت کے نوجوان اور جوانوں کے لئے تین روزہ کارگاہ میں مختلف موضوعات کے علاوہ عملی طریقہ کار بھی پیش کئے گئے۔ کارگاہ میں وادی اور بیرون وادی کے علماء کرام نے شرکت کی۔ اس تین روزہ وکشاپ  میں جہاں کئی اہم موضوعات پہ فکری اور علمی گفتگو ہوئی وہیں پہ عملی طور پہ بھی معاشرے میں بنتے، بگڑتے ہوئے حالات پہ بھی گفت و شنید ہوئی۔ کارگاہ میں شریک جوانوں نے علماء کی قیادت میں ضلو انت ناگ کے تاریخی مغل باغ  میں عشق معنوی کے نام سے ایک اہم پروگرام کا اہتمام بھی کیا جس میں نوجوانوں نے صفائی اور نظافت کی مہم کے حوالے سے صفائی کلچر جو کہ اسلام کا بنیادی تعلیمات کا حصہ ہے، کی طرف توجہ دلاتے ہوئے خود سے صفائی اور متعلقہ افراد سے اس بارے میں گفتگو کی کہ تاریخی اور سیاحتی مقامات کو ہر جہت سے پاک و صاف رکھنے کی اشد ضرورت ہے۔ اسی دوران باغ میں ڈرگس اور  منشیات کے خلاف مہم چلائی گئی جس میں علماء اور جوانوں نے باغ کے اندر موجود دیگر سیاحوں کو اس مہلک بیماری کے بارے میں آگاہ کیا کہ وہ اپنی نسل اپنے بچوں کو کس طرح سے منشیات اور نشے سے پاک و صاف رکھ سکتے ہیں۔

اس بات کی طرف بھی توجہ دلائی گئی کہ انتظامیہ کو بھی ان امور سے نمٹنے  کے لئے ایک ٹھوس، منظم اور پُرعزم پروگرام کرنے کی ضرورت ہے۔ علماء اور دیگر جوانوں نے اس پہ بات تاکید کی کہ جب تک والدین اور مختلف ادارے جو سماجی لیول پہ معاشرے کے لئے مفید ہوتے ہیں، مل جل کر اس بیماری اور نشے کا خاتمہ نہ کریں تب تک یہ کام ختم نہیں ہوپائے گا۔ آخر میں امت مسلمہ اور بالخصوص امت کشمیر کو ایک مرتبہ پھر قرآن کی طرف بازگشت کرنے کی ضرورت پر زور دیا گیا  کہ اگر امت اور سماج کے افراد قرانی تعلیمات پر عمل کرتے رہیں گے تو ان جیسی ناگہانی اور مہلک مسائل اور آفتوں سے بھی سماج اور سماج کے افراد کو بچایا جا سکتا ہے لہذا ان سب بیماریوں کا علاج قرآنی تعلیمات پر عمل کرنے میں مضمر ہے۔ اس کے علاوہ امیر المومنین حضرت علی (ع) کی عظیم الشان کتاب نہج البلاغہ کی طرف بھی لوگوں کی توجہ مبذول کرائی گئی۔ جوانوں نے ہاتھوں میں پلے کارڈ، قرآن اور نہج البلاغہ اٹھا کر یہی پیغام دیا کہ اگر انسانی سماج کو کوئی بچا سکتا ہے تو وہ یا قرانی طرز تعلیم ہے یا پھر نہج البلاغہ نایاب فرامین اور انسانی زندگی کو سدھارنے والے انمول اصول زندگی ہیں۔

کارگاہ میں شہداء انقلاب اور شہداء اسلام سے متعلق ایک نمائش کا اہتمام بھی کیا گیا جس میں جوانوں نے بڑھ چڑھ کے حصہ لیا۔ شہداء کی سیرت اور ان کے طرز زندگی کو احیاء کرنے پہ تاکید کی گئی۔ نمائش میں ایک حصہ شہید مرتضی مطہری کی 40 جلدوں پر مشتمل کتاب سیریز بنام ’’حکمت مطہر‘‘ کی بھی نمائش پیش کی گئی۔ کارگاہ کی اس نمائش کے افتتاح کے لئے وادی کشمیر کے معروف و  مشہور اسلامی سکالر ڈاکٹر سمیر صدیقی کو مدعو کیا گیا تھا۔ ڈاکٹر سمیر صدیقی نے جوانوں کے اس حکمت آمیز قدم کی سراہنا کرتے ہوئے اپنے خطاب میں جوانوں کو ایسے پروگراموں کی اور مزید رغبت دلانے پر تاکید کی۔ اختتامی تقریب میں ڈاکٹر سمیر صدیقی کے ہاتھوں سے شرکاء کارگاہ کے درمیان  اسناد اور انعامات بھی تفسیم کئے گئے۔