اسلام ٹائمز۔ بلوچستان نیشنل پارٹی کے رہنماء غلام نبی مری نے کہا ہے کہ اسمبلی اراکین عوامی رائے سے نہیں بلکہ چور دروازے سے ایوان میں پہنچے ہیں۔ تحریک تحفظ آئین عوامی امنگوں کے مطابق ہے۔ انہوں نے اپنے بیان میں تحریک تحفظ آئین کے قیام کو خوش آئند قرار دیتے ہوئے کہا کہ یہ تحریک وقت کی ضرورت اور عوام کی خواہشات اور امنگوں کے عین مطابق ہے۔ پشین کے جلسہ میں شدید بارش اور جلسہ گاہ میں پانی کے باوجود لوگوں کی کثیر تعداد میں شرکت نے ثابت کر دیا کہ عوام کے لئے فارم 47 کے تحت بننے والی جعلی اور فراڈ حکومت قابل قبول نہیں۔ ایوان میں بیٹھے ہوئے ارکان عوامی رائے سے نہیں بلکہ چور دروازے سے پہنچے ہیں۔ انہوں نے محمود خان اچکزئی کو تحریک تحفظ آئین کا چیئرمین منتخب ہونے پر مبارک باد بھی دی۔