اسلام ٹائمز۔ مرکزی جنرل سیکرٹری مجلس وحدت مسلمین پاکستان سید ناصر عباس شیرازی کا کہنا ہے کہ 6 جولائی کو اسلام آباد میں پی ٹی آئی کے جلسے کی منسوخی کی تجویز سے متعلق گردش کرنیوالی خبروں کی سختی سے تردید کرتا ہوں۔ انہوں نے کہا کہ مجلس وحدت مسلمین نے جلسہ منسوخ کرنے اور محرم الحرام کے آغاز کے باعث مصروفیات کی ایسی کوئی تجویز نہیں دی۔ اس طرح کا پروپیگنڈہ اور افواہیں پھیلانا مخالفین کا روایتی حربہ ہے، جس کا مقصد پی ٹی آئی کے جلسے کو ناکام بنانا ہے۔ ناصر شیرازی کا کہنا تھا کہ پاکستان تحریک انصاف کا جلسہ محرم الحرام سے دو روز قبل منعقد ہونا ہے، جس کا مقصد ظلم کیخلاف اور مظلوموں کی حمایت میں آواز بلند کرنا ہے۔ انہوں نے کہا کہ مجلس وحدت مسلمین اس جلسہ میں بھرپور شرکت کرے گی۔