بی جے پی انتخابات جیت گئی تو پھر کبھی بھی بھارت میں الیکشن نہیں ہونگے، سنجے سنگھ

اسلام ٹائمز۔ عام آدمی پارٹی نے ہم وطنوں سے اپیل کی ہے کہ وہ بی جے پی سے ملک کے آئین اور جمہوریت کو بچائیں۔ عام آدمی پارٹی کے سینئر لیڈر اور ممبر آف پارلیمنٹ سنجے سنگھ نے کہا کہ اگر بی جے پی اور نریندر مودی یہ الیکشن جیت جاتے ہیں تو اس ملک میں دوبارہ کبھی بھی الیکشن نہیں ہوں گے۔ وہ گجرات کے سورت میں پیش آنے والے واقعہ کا حوالہ دے رہے تھے۔ کہا گیا کہ بی جے پی نے ملک کے آئین کو ختم کرنے کی شروعات سورت سے کی ہے۔ سورت میں کانگریس سمیت تمام پارٹیوں کے امیدواروں کے کاغذات نامزدگی مسترد کر دیے گئے اور بی جے پی امیدوار کو انتخابات سے پہلے ہی جیت کا سرٹیفکیٹ دے دیا گیا۔ تاریخ میں پہلے کبھی ایسا نہیں ہوا کہ کوئی حکمران جماعت بغیر انتخابات کے منتخب ہوئی ہو اور جیت گئے ہوں۔ عام آدمی پارٹی کے لیڈر نے کہا کہ سورت تو بس ایک جھلک ہے، پورے ملک میں ایسا دیکھنا ابھی باقی ہے۔ انہوں نے کہا کہ اقتدار میں آتے ہی یہ لوگ بابا امبیڈکر کے آئین، ریزرویشن، ووٹنگ کے حقوق کو ختم کر دیں گے اور آر ایس ایس کے آئین کے ساتھ ملک چلائیں گے۔ انہوں نے کہا کہ بی جے پی کا مقصد صرف آئین کو تباہ کرنا ہے۔

عام آدمی پارٹی کے سینئر لیڈر اور راجیہ سبھا ممبر پارلیمنٹ سنجے سنگھ نے جمعرات کو پارٹی ہیڈکوارٹر میں ایک پریس کانفرنس میں بی جے پی کی آئین کو تبدیل کرنے کی سازش پر سخت حملہ کیا۔ انہوں نے کہا کہ گزشتہ 10 سالوں میں ہندوستان کی جمہوریت کو تباہ کرنے کی کوششیں کس طرح کی گئیں اور آپریشن لوٹس چلا کر اسے کیسے حاصل کیا گیا۔ مختلف حکومتوں کو گرانے کی کوششیں کی گئیں، اس کی زندہ مثال پورے ملک کے سامنے ہے۔ انہوں نے کہا کہ اب جو سورت سے شروع ہوا ہے وہ اس بات کا اشارہ ہے کہ پچھلے 10 سالوں میں آپریشن لوٹس چلا کر بی جے پی نے مختلف ریاستی حکومتیں توڑیں، ایم ایل اے کو توڑا اور خریدا، حکومتیں گرائیں لیکن 2024ء میں اس کے بعد اس ملک میں الیکشن نہیں ہوں گے۔ سنجے سنگھ نے ملک کے 140 کروڑ عوام سے اپیل کرتے ہوئے کہا کہ یہ آپ کا آخری الیکشن ہے، اس کے بعد آپ کو ووٹ کا حق نہیں ملے گا۔ سنجے سنگھ نے کہا کہ بی جے پی نے پورے ملک میں افراتفری پھیلا دی ہے، یہ لوگ طاقت کا استعمال کرتے ہیں۔