بھارت میں 70 کروڑ لوگ بے روزگار ہیں، پرینکا گاندھی

اسلام ٹائمز۔ بھارت میں عام انتخابات کو لے کر مختلف سیاسی پارٹیاں سرگرم ہوگئی ہیں۔ ہر طرف انتخابی سرگرمیاں بھی شروع ہوگئی ہیں۔ سیاسی لیڈروں کے مختلف شہروں اور ریاستوں میں انتخابی دورے بھی بڑھنے لگے ہیں۔ فی الحال کانگریس کی جنرل سکریٹری پرینکا گاندھی انتخابی مہم کے لئے آسام پہنچی ہوئی ہیں۔ یہاں دھوبری میں ایک جلسہ عام سے خطاب کرتے ہوئے کانگریس لیڈر نے وزیراعلٰی ہمانتا بسوا سرما اور بی جے پی کو سخت نشانہ بنایا۔ انہوں نے کہا کہ بھارت میں 70 کروڑ لوگ بے روزگار ہیں۔ درایں اثنا ذرائع کے مطابق راہل گاندھی اور پرینکا گاندھی نے امیٹھی اور رائے بریلی سے الیکشن لڑنے سے انکار کر دیا ہے۔ اس دوران ان دونوں سیٹوں پر امیدواروں کے ناموں پر رسہ کشی بڑھ گئی ہے۔ جہاں ایک طرف ریاستی اکائی مسلسل دباؤ ڈال رہی ہے وہیں دوسری طرف راہل گاندھی پرینکا گاندھی الیکشن لڑنے کو تیار نہیں ہیں۔ ذرائع کا کہنا ہے کہ کانگریس صدر ملکارجن کھڑگے کے پاس آج آخری موقع ہے کہ وہ راہل گاندھی کو امیٹھی سے الیکشن لڑنے پر راضی کریں۔