سانحہ نو مئی کے بلوائی کسی رعایت کے مستحق نہیں، گورنر گلگت بلتستان

اسلام ٹائمز۔ گورنر گلگت بلتستان سید مہدی شاہ نے کہا ہے کہ نو مئی 2023ء ملکی تاریخ کا سیاہ ترین دن ثابت ہوا، جسکی وجہ سے یوم سیاہ کے طور پر منانے کا فیصلہ کیا گیا۔ یہ وہی سیاہ دن ہے جب شرپسند عناصر نے شہدائے وطن کی یادگاریں گرائیں اور قومی ہیروز کے مجسموں کو جلا دیا۔ اس سیاہ دن ملکی اہم تنصیبات اور شہداء کی یادگاروں پر حملہ کیا گیا جس سے شہداء کے لواحقین ابھی تک افسردہ ہیں۔ شدت پسند عناصر نے اس ادارے کی املاک کو نقصان پہنچایا جنہوں نے پاکستان کے دفاع کو ناقابل تسخیر بنایا ہوا ہے، یہ بلوائی کسی قسم کی رعایت کے مستحق نہیں ہیں۔ بعض تنصیبات ملک و قوم کا فخر ہوتی ہیں جو ریڈ لائن ہوتی ہیں، محض اقتدار کی خاطر انہیں روند دینا ناقابل برداشت جرم ہے۔