اسلام ٹائمز - مقبوضہ کشمیر میں انسانی حقوق کی پامالی میں بے پناہ اضافہ ہو چکا ہے، بیرسٹر سلطان

مقبوضہ کشمیر میں انسانی حقوق کی پامالی میں بے پناہ اضافہ ہو چکا ہے، بیرسٹر سلطان

سردار عتیق سے ہونیوالی ملاقات میں صدر آزاد کشمیر کا کہنا تھا کہ مقبوضہ کشمیر میں مودی سرکار نے کشمیری عوام پر ظلم و جبر کے پہاڑ توڑ دیے ہیں۔

اسلام ٹائمز۔ صدر آزاد کشمیر بیرسٹر سلطان محمود چوہدری سے سابق وزیراعظم آزاد کشمیر و ممبر قانون ساز اسمبلی و صدر آل جموں و کشمیر مسلم کانفرنس سردار عتیق احمد خان کی ایوان صدر کشمیر ہائوس اسلام آباد میں تفصیلی ملاقات۔ اس موقع پر ملاقات میں سابق وزیراعظم آزاد کشمیر سردار عتیق احمد خان کے فرزند سردار عثمان عتیق اور صدارتی مشیر سردار امتیاز خان بھی موجود تھے۔ اس موقع پر صدر آزاد کشمیر بیرسٹر سلطان محمود چوہدری نے کہا کہ مقبوضہ کشمیر میں مودی سرکار نے کشمیری عوام پر ظلم و جبر کے پہاڑ توڑ دیے ہیں، مقبوضہ کشمیر میں انسانی حقوق کی پامالی میں بے پناہ اضافہ ہو چکا ہے اور مودی نے بھارت میں ہونے والے آئندہ عام انتخابات جیتنے کے لئے مقبوضہ کشمیر میں ظلم و بربریت میں مزید اضافہ کر دیا ہے تو ایسے حالات میں آزاد کشمیر کی تمام سیاسی جماعتوں اور سیاسی قیادت کو اندرون و بیرون ملک مودی کی ریشہ دوانیوں کے خلاف بھرپور انداز میں متحد ہو کر اپنی آواز بلند کرنی چاہیے کیونکہ بھارت اپنی احمقانہ پالیسیوں کی وجہ سے خود ہی دنیا میں بے نقاب ہو رہا ہے۔