QR Code

تارکین وطن کشمیریوں نے ہمیشہ مختلف عالمی فورمز پر بھارتی غاصبانہ قبضے کو بے نقاب کیا، سردار عتیق

18 Apr 2024 10:04

تارکین وطن کشمیریوں سے گفتگو کرتے ہوئے مسلم کانفرنس کے صدر کا کہنا تھا کہ یرون ملک آباد کشمیری تارکین وطن جدوجہد آزادی کشمیر کے سفیر کی حیثیت رکھتے ہیں۔

اسلام ٹائمز۔ آل جموں و کشمیر مسلم کانفرنس کے صدر و سابق وزیراعظم سردار عتیق احمدخان نے کہا کہ بیرون ملک آباد کشمیری تارکین وطن جدوجہد آزادی کشمیر کے سفیر کی حیثیت رکھتے ہیں، جنہوں نے ہمیشہ مختلف عالمی فورمز پر پوری قوت کے ساتھ ہندوستان کے غاصبانہ قبضے اور ظلم و بربریت کو بے نقاب کیا ہے، خاص طور پر 5 اگست کے بعد دنیا بھر کے اندر نریندر موودی کے ظالمانہ اقدامات کے خلاف تارکین وطن کا ایک موثر کردار ہے۔ ان خیالات کا اظہار انہوں نے مجاہد منزل میں مسلم کانفرنس نارتھ امریکہ کے صدر سید آفتاب شاہ، سید اظہر علی شاہ، سید شاہ حسین اور سید مظہر حسین شاہ سے ملاقات میں گفتگو کرتے ہوئے کیا۔ انہوں نے کہا کہ تارکین وطن نے جس طرح سے مسئلہ کشمیر کے حوالے سے اپنا جاندار موقف پیش کیا ہے وہ لائق تحسین ہے۔ انہوں نے کہا کہ کشمیر میں چلنے والی تحریک آزادی کامیاب ہو گی، اقوام متحدہ کشمیریوں کو ان کا پیدائشی حق دلوانے کیلئے کردار ادا کرے، نہتے کشمیریوں کے ساتھ کرفیو، لاک ڈاؤن لگا کر جو ظلم ستم جاری ہے اقوام عالم کو اس کا نوٹس لینا چاہیے۔ انہوں نے کہا کہ اقوام متحدہ اپنا دوہرا معیار ختم کرے، دوہرے معیار کی وجہ سے خود اقوام متحدہ کی ساکھ ختم ہو رہی ہے اور اقوام متحدہ کو اب صرف مغرب کا نمائندہ سمجھا جا رہا ہے۔

خبر کا کوڈ: 1129448